الارشيف / أخبار المغرب / كود

مزيان دار واحد إعادة نظر فدروس التربية الاسلامية حيت مايمكنش فالفين وسطاش مازال الناس كايقراو يدوزو امتحانات ف الجهاد وحد الردة وملك اليمين…

  • 1/2
  • 2/2

سهام البارودي كود /////

مزيان تدار واحد عملية اعادة النظر و التنقيح لدروس التربية الاسلامية ! هذا هو الوقت حيت مايمكنش فألفين و سطاش فوقت العولمة و حقوق الانسان و الحريات الفردية مازال حنا فالمقررات ديالنا كانقريو للدراري ” حد الردة” ! و “من غير دينه فاقتلوه” و “الجهاد” و “السبايا” و “ملك اليمين”، و كايدوز امتحان فيه اسئلة من قبيل ” اذكر عدد الجلدات التي يستحقها الزاني و علل جوابك” ! خطوة مزيانة كاتبين أنو غادي فالطريق الصحيح … يمكن ماشي بالسرعة المطلوبة و لكن الاهم أننا في الطريق doucement mais sûrement !

الانسان فاش كايمشي للمدرسة خاصو نورمالمو يتعلم يفكر ، يتربى عندو الحس النقدي ، ينتاقد أي حاجة و كل حاجة و يطرح الأسئلة لي عندو … هاكا يمكن للمدرسة تعطينا انسان سوي كايفكر و كايخدم دماغو ماشي حولي فينما زادو الحوالا تابعهم ! تخايل كن كل واحد كانت عندو فرصة يهز صبعو و يسول “علاش؟” بلا مايمنعو الاستاذ و لا يحشم من النظرة ديال الدراري لي معاه !كانو بزاف ديال الاسئلة لي خبيناهم غانلقاو ليهم أجوبة و ماشي مهم الأجوبة بقدر ما انك تتعلم تطرح السؤال و ماتقمعش راسك ! هاد القضية ديال طرح سؤال كايشجعو عليها الاساتذة ديال بزاف ديال المواد ! الرياضيات مثلا ، الفيزيك ، العربية، الفرنسية، الفلسفة ، كلنا فاش قرينا عقلنا على داك الاستاذ لي كان كايقولينا ” يالاه ! شكون مافهمش نعاود نشرح ؟ يالاه لي مافهمش يهز صبعو! لي عندو شي سؤال يطرحو ” النقاش و الاسئلة كان يمكن تطرحها فجميع المواد إلا مادة التربية الاسلامية ! المادة الوحيدة لي ماكاتشجعش على التفكير و اعمال العقل و شحال من استاذ ديال التربية الاسلامية كايسبق للتلاميذ ديك الفكرة ديال ” عقل الانسان قاصر على التفكير في بعض الأمور ” باش مايفرعوش ليه راسو بالأسئلة و باش بينهم و بين راسهم يقتانعو انه ماخاصهمش يطرحو اسئلة الاستاذ براسو كايتفادا يطرحهم على راسو تفاديا للإحراج !التلميذ كايتعلم يقمع راسو و هاد الفكرة بحد ذاتها ديال “عقل الانسان قاصر عن التفكير ” راه هي لي خرجات على أمة ديال الباشار و خلاتنا اللور اللور … تخايل كون نيوتن فاش طاحت عليه التفاحة ” قال مع راسو عقل الانسان قاصر على التفكير و مشا طحنها مع الحليب و سانيدا ف”مولينيكس” شكون كان غايكتاشف الجاذبية ؟!

آيات الجهاد ، و الجزية و ملك اليمين ، و الحدود … هادشي كلو اليوم ماعندوش بلاصتو وسط مجتمع متحضر خاضع للقانون الوضعي ! قانون فيه عقوبات سالبة للحرية ماشي عقوبات جسدية ! حيت حنا عايشين فالمغرب ماشي فولاية الرقة فالدولة الاسلامية باش نقريو للدراري و ندوزو ليهم امتحانات فرجم الزاني و جهاد الكفار و دفع الجزية … كيفاش اليوم غانهضرو على دفع الجزية فمجتمعات كايعيش فيهم المسلم و المسيحي و اليهودي و البوذي و اللاديني مع بعضهم … ؟ مايمكنش ! كيفاش اليوم غانقريو للدراري آيات الجهاد من قبيل ” فإذا لقيتم الذين كفروا فضرب الرقاب” و نتسناو منهم مايكونوش دواعش أو مشاريع دواعش فالمستقبل يمشيو لسوريا و لا قندهار يشاركو ف”الجهاد ضد الكفار”!؟ كيفاش يمكن لتلميذ دوز ساعة و الاستاذ كايشرح ليه أنو كاينة واحد الحاجة سميتها “ملك اليمين”، يعني مرا تشريها من السوق و تنكحها بلا زواج بلا حب بلا ماتكون بيناتكم علاقة فحال لامشيتي تقديتي مونيكة…؟ و تطلب من نفس التلميذ يآمن بحقوق المرأة و يشوف فيها شريك ماشي سلعة كاتباع و تشرى !

بزاف ديال الحوايج اليوم الحضارة الانسانية تجاوزاتهم، وخاصنا تاحنا نتجاوزوهم ! طبعا هاد القضية ديال اعادة النظر فدروس التربية الاسلامية ماكاتعجبش بزاف ديال الناس من بينهم هادوك لي مآمنين بأنه صالح لكل زمان و مكان و هادي حاجة عادية حيت هاد الناس كايآمنو بديك la suprématie ديال الدين و أنو مايمكنش مايمكنش نبدلو و لا نقيسو و لا نحيدو شي حاجة ، و أي محاولة للإجتهاد كايقابلوها بالرفض ! فحال هاد الناس لي حرقو الكتوبة ديال ابن رشد و اتهموه بالزندقة … فحال هاد الناس لي كاتلقاهم عبر التاريخ ديما واقفين عصبة ضد التفكير و العقل و المنطق ! الدواعش دعاه الفتنة ! أعداء السعادة… الناس لي مايمنكش طبعا تقتارح عليهم أنو من الاحسن التلاميذ يقراو جميع الاديان مثلا ، ايه و شنو فيها آبعرور أنو ولدك تكون عندو فكرة على الديانات اليهودية و المسيحية و الاسلامية ؟ و يعرف تاريخها و يقرا “مقارنة الاديان” ، شنو فيها ؟ ينفاتح التلميذ على حوايج خرا ؟ خايف عليه يكفر ؟ إيوا لا ! الدين الاسلامي ماشي هشيش لديك الدرجة باش يكفر بيه الواحد حيت قرا تاريخ الاديان بالعكس … غايكونو عندنا تلاميذ واعيين و عندهم عامة غنية كايتقبلو الآخر و عندهم فكرة على المعتقدات الأخرى غاتخليهم يحتارمو الناس الاخرين و ماشي يشوفو فيهم كفار خاصهم الجلد و لا القتل و لا الجهاد و لا السبي …

اعادة النظر فالتربية الاسلامية كاتبقا ضرورية ! خطوة مهمة لابغينا نزيدو القدام و نعلمو للدراري يقراو و يفكرو بعقلهم ماشي يحفظو و يتقياو داكشي لي حفظوه !

فهاماطور للأخبار والأنباء

تطبيق الاخبار على الجوال

كنت تقرأ خبر عن مزيان دار واحد إعادة نظر فدروس التربية الاسلامية حيت مايمكنش فالفين وسطاش مازال الناس كايقراو يدوزو امتحانات ف الجهاد وحد الردة وملك اليمين… في فهاماطور للأخبار والأنباء ونحيطكم علما بان محتوى هذا الخبر تم كتابته بواسطة محرري كود ولا يعبر اطلاقا عن وجهة نظر فهاماطور للأخبار والأنباء ، ويمكنك قراءة الخبر من المصدر الاساسي له من الرابط التالي كود مع اطيب التحيات.

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا